Artemanek ezohiko afari baterako menuaren karta diseinatu du

Eusko Jaurlaritzak Milanen ekainaren 20an zabaldu berri duen bulego komertzialaren irekieran Euskal Herriko eta Italiako ordezkaritzek dastatutako menuaren kartak Artemanek diseinatu ditu.

Menu honen diseinua 2 gorputz bertikalen formatoan oinarrituta dago; horietako bat, barrukoa, paper begetalean egina dago, 3 hizkuntzatan inprimituta eta josita elkarri Euskal Herriko eta Italiako ikurrinen kolorea duten zintekin. Material, teknika, tipografia eta ilustrazioen uztartzeak gaurkotasuna eta tradizioa batu ditu emaitzean.

Menu bereizgarri honetan Eusko Label jatorri-deiturako produktuekin landutako plater italiarrak zerbitzatu ziren; Contraste jatetxeko Matías Perdomo chef italiarrak sortu zituen, Mugaritz jatetxeko Andoni Luis Aduriz chef-aren laguntzarekin.